وش البركةكان شارع من شوارع الدعارة المستوردة فى مصر.. بنات من مختلف الجنسيات، وبُرمجية بيفرضوا سيطرة عليهم، وبدرونات بيتفوضوا على سعر ساعة المتعة مع الزباين.
وبين عناصر كل التجارة كانت بتقوم خناقات ومشاحنات وبيقع ضحايا ومصابين من كل الأطراف.
ولإن الحاجة أم الإختراع..
عدد من الإيطاليين واليونانيين ومنهم بيترو فازاى قرروا يساعدوا فى المشكلة بطريقة مبتكرة.. اشتروا كمية كبيرة من الشاش والقطن والمطهرات، واختاروا قهوة بلدى فى الشارع تكون مقر لـ لوازم الاسعافات الأولية ولإسعاف الجرحى.
وبعد ما كان رواد شارع وش البركة من الباحثين عن المتعة بقى معظمهم من الباحثين عن الإسعاف السريع من ضحايا شوارع الليل واخره وضحايا صراع الفتوات وخناقات الشوارع.
مع الوقت ضاقت القهوة بروادها المصابين، واختلط الحابل بالنابل.. اللى طالب شاى خمسينة باللى طالب شاش تجبيرة، فكان لزام على المؤسسين نقل النشاط من قهوة وش البركة لـ دكان فى شارع جامع جركس وكان أول مقر لجمعية الإسعاف المصرية.
أول اختبار حقيقى لمتطوعين الإسعاف كان وباء الكوليرا سنة 1902، والكوليرا فى اللهجة الدارجة المصرية هى "الشوطة" اللى بتاخد كل اللى يقف فى طريقها ومابتخليش، ورجال الاسعاف فى نظر المصريين فى الوقت ده "بتوع الشوطة"، وهنا ظهرت عادة هرش الراس وقت ظهورهم تشائما من وجودهم.
الإختبار فى حقيقته كان صعب لانه ماوقفش على مواجهة المرض وبس.. وصل للصدام بمفاهيم وعادات الناس، وأصعبها على الاطلاق انهم واجهوا الضرب بالشباشب والطوب.
الجمعية مع الأيام كبرت بزيادة المتبرعين وزيادة عدد المتطوعين وبقى لها فروع فى اكتر من محافظة، ومستوصف علاج وصيدلية.
واعترفت الحكومة رسميا بجمعية الإسعاف سنة 1908، ورخصت للجمعية حق إصدار يانصيب إسبوعى لتمويل أنشطة الجمعية.
فى الفيضانات تلاقيهم متصدرين المشهد وفى زمن الأوبئة تلاقيهم نجوم الحدث، وفى الإضطرابات حاضرين بقوة..
اللى لفت إنتباهى لدور جمعية الإسعاف وتاريخها كانت ثورة 1919.. مع كل مظاهرة ضحايا بيقعوا على الأرض، وف كل مظاهرة متطوعين إسعاف بيخترقوا الصفوف الأولى للوصول للمصابين.. بس ده ماكنش المشهد الصعب اللى يلفت الإنتباة.
المشهد الصعب ان الثوار كانوا بيعتبروا كل اللى لابس خوذة معدن جزء من الجيش الإنجليزى، وفى الحدث ده تحديدا كان رجال الاسعاف بيلبسوا خوذة معدن.. سيب لخيالك رسم باقى المشهد والمأساة.
إنتهت الثورة، وحصلت جمعية الإسعاف المصرية لأول واخر مرة فى تاريخ ثورات العالم على نوط الجدارة الذهبى.
والبداية.. فى قهوة ف شارع وش البركة.
